BROW Pencil Benefit

السلام عليكم حبيباتي 

اليوم راح أحط تجربتي مع قلم الحواجب من بنفت ! 

اتعمدت استخدمه لين يخلص حتى احط تجربتي عنه بكل أمانة ! هوا يرتب الحواجب ويخلي شكلها طبيعي ويجنن ولكن ! اكتشفت خلال فترة استخدامي له انو شعر حواجبي طاح !! ولمن فتحته لقيت فعلا انو شعر حواجبي عالق بنفس القلم وانا ماكنت منتبهة فكرت إنو جل فمارح يطيح حواجبي زي باقي الاقلام ولكن العكس صار للأسف لأنه كان يضغط على شعر الحاجب ! 

عن تجربة حسيته يناسب البنات الي شعر حواجبهم كثيف للترتيب السريع ومو للإستخدام اليومي < حطوا تحتها مليون خط !!! أما بالنسبة للبنات الي شعر حواجبهم من قليل لمتوسط انصحهم بالفرشة وحتى للبنات الي شعر حواجبهم كثيف برضو ماعليه تتدربوا عالفرشة كل يوم لين تتمكنوا منها افضل 👌🏻

* هالقلم احسه مناسب للسفر أكثر شي أو الاستخدام السريع مابين فترة وفترة 👍🏻

متوفر ب ٦ ألوان : 

وهذا تطبيق العارضة بإستخدام قلم الحواجب من بنفت ؛ 

* سعره ١٢٥ ريال سعودي .

بيبي كريم جيرلان

كيفكم اليوم يا حبيباتي انتو 😍 

اليوم زي ماوعدتكم ححطلكم ريڤيو عن بيبي كريم جيرلان 

عن نفسي وقعت بغرامه مرة مرة وسرت استخدمو حتى ف المناسبات الكبيرة زي الزواجات لانو يقعد لمدة ٧ ساعات واكثر  ثابت عالوجه ! وفوق كذا تغطيتو تجنن بالنسبة لبيبي كريم ! يغطيلك اثار الحبوب غير عن اي بيبي كريم ثاني وكمان خفيف عالوجه ويندمج بسرعة معاكم ومايتأكسد! 

زي ماخبرتكم انو ينفع لاي بشرة بس لازم طريقة استخدام صحيحة ! 

بالنسبة للبشرات الجافة او العادية يرطبو وجههم تمام بعد كذا يحطوه على نفس البيوتي الرطبة وبعدين يطبطبو عالوجه وهكذا .. 

اما البشرات المختلطة والدهنية حطو البرايمر الخاص بنوع بشرتكم بعد كذا وزعوه بفرشة على كامل الوجه بعد كذا بالبيوتي الرطبة نظفو الزايد 

نوعية البيبي كريم ديوي فحطوا عليه لوس باودر حتى تطفي اللمعة وتعطي مظهر مات وبرضو اصحاب البشرات الجافة والعادية ممكن يستخدموا هذه الطريقة اذا حبوه يكون مات 

المنتج يرطب البشرة ويوحد لونها ويعطي نظارة ويحمي من الشمس بقوة ٣٠ وريحته حلوة كمان 

متوفر منو ٣ درجات ( لايت ، ناتشورال ، ميديام ) 

سعره تقريبا ١٩٩ ريال 

تلقوه متوفر في : ڤاڤاڤوم ، وجوه ، باريس غاليري ، وممكن سيفورا 

وهنا فيديو توضيحي 

شايفين كيف ماحتاجت تحط برايمر لاحمرار وجهها على طول اعطاها تغطية حلوة !! ومن شدة انو سهل ف الدمج دمجتو بيدها بسرعة وسهولة 😍 واعطاها نظارة وخلى وجهها فريش صحي وندي 👏🏻 

صراحة من البيبي كريم الي حرجع اشتريه كمان وكمان 👍🏻

الماسكرا السحرية للحواجب من بينڤت

السلام عليكم جميلاتي ..

هذا الموضوع يخص بالذات البنات الي يمتلكون حواجب كثيفة ! 

نصيحتي لكم حبيباتي انكم تكتفو بتعبئة فراغات الحواجب فقط ومن ثم استخدام ماسكرا بنڤت الشفافة للترتيب والتثبيت 

ما اقدر اوصفلكم قد ايش الماسكرا جميييييلة !! لانها مو بس لترتيب وتثبيت شعر الحاجب ! كمان تحافظ على رسمة الحاجب سواء كان جل او باودر لمدة تزيد عن يوم !! وبكذا حتى البنات الي شعر حواجبهم قليل يقدروا يستخدموها من دي الناحية 😍 ! ومحبات شعر الحاجب الغجري ايضا ! بس انتبهوا حبيباتي استخدموها للضرورة عشان كثرتها ممكن يطيح شعر حاجبكم ❤️

تلقوها متوفرة في سيفورا " benefit " تقريبا ب ١٦٠ ريال سعودي 

وهنا طريقتي ف استخذامها للحواجب الكثيفة 

وهذا فيديو مبسط للماسكرا السحرية الي مستحيل استغنى عنها سرت في جميع اللوكات !!

سيريوم الشعر من Kerastase

السلام عليكم حبيباتي

اليوم موضوعنا عن راح يكون عن الشعر 💇🏻

وخاصة أصحاب الشعور الكيرلي ومحبين استايل الاستريت، شتان مابين الكلمتين بس هذا المنتج جمعهم سوا 😍

أولا الشعر الكيرلي : وخاصة النوعية الي تنفش بعد الشاور ضغطة من السيريوم أو ضغطتين حطيها على كف اليد وبعدين عالشعر بطريقة ضغط الشعر وليس المسح عليه، راح يهجد الشعر من النفش ويطلع الشكل الكيرلي بشكل أجمل بكثيييييير 

ثانيا محبين استايل الاستريت : استغنيت عن الليس بعد هالسيريوم استشوروا الشعر بشكل عادي مو متقن بعدين حطوه على كامل الشعر بطريقة التمسيد ( المسح القوي على الشعر ) وبعدين ارجعوا استشوروه بشكل متقن راح ينفرد معاكم الشعر على طوول 👌🏻 

البنات الي يعانوا من البيبي هير ( الشعر الصغير الي يطلع جديد وغالبا يكون واقف عند البعض ) راح يفيدكم بتهجيدها 

ملاحظة : السيريوم الجبار يقعد فعال لمدة ٧٢ ساعة 😍🕟

غالبا تلقوه في ( نزيه ، محلات الجامعة الشعبية المختصة بأغراض الصوالين ، اغلب صوالين جدة : بثينة ، جويل ، لمسات ، منّه سنتر  ، نوارة ، اوريانا، سڤن إل ) . 

قطرة إنجلوت ( Full Option )

كيفكم جميلاتي 😍 

اليوم موضوعنا عن قطرة إنجلوت اطلقت عليها اسم ال full option لانها متعددة الإستعمال 👏🏻

أي جل عندك ناشف سواء جل لاينر أو جل حواجب أو ماسكرا قطرة وحدة منها ترجع المنتج زي ماكان 👌🏻

تقدروا تستخدموها مع القليتر تحولوه شادو شيمر ✨ أو تحطوها عالشفايف قبل الروج وممكن عالروج نفسو  اذا كان مات او غيره راح يثبتو لكم وممكن تحطوها على شادو باودر يتحول لتاتو حواجب 

تقدروا كمان تحطوها عالهايلايت الباودر يتحول كريمي ✨

مليون استخدام لها عالقطرة اتعب اقولكم جميييلة ولازم تكون عند اي بنت 😍❤️

طريقة استخدامها جدا سهلة تضغطي من فوق حسب عدد القطرات الي تبيها 👌🏻
تلقوها في محلات إنجلوت ، سعرها تقريبا ب ٥٥ ريال
تستاهل اسم القطرة السحرية 🌟

NYX Liquid Illuminator

كيفكم حبيباتي ..

اليوم راح اتكلم عن هايلايت إن واي إكس الجديد

البنات الي يحبو الوجه يطلع فريش وصحي انصحكم فيه جدا من نقطة وحدة تحطوها يعطيكم تغطية تجنن 

الهايلايت قوامه كريمي يندمج ببيوتي رطططبة ضروري !! او بالاصباع 

اذا دمجتوه ببيوتي جافة راح ينشال كلو فيها وهذا غلط ! 

هنا فيديو يوريكم طريقة استخدامه : 

طبعا الهايلايت بنات متوفر منو ٤ الوان للبشرات ( البيضا ، الحنطية ، السمراء، الداكنة )
اشتريتو تقريبا ب ٣٩ ريال

تغطية فوق راااائعة 👏🏻
شكرا لكم ❤️

ڤيتامين E من بودي شوب

ڤيتانين E من بودي شوب 

فيتامين e من بودي شوب ✨ جميل هالمنتج للمسام ولآثار الحبوب وبنفس الوقت مرطب للوجه انصح فيه للي يعانوا من الجفاف قبل الميك اب تحطي منو وخلي البشرة تمتصوا وشوفوا الفرق بعدها 😍👌🏻 طريقته : حطي بأطراف اصابيعك ومديه على بشرتك ورقبتك بحركات دائرية ❤️ @thebodyshopjed #bodyshop